Bíll fór fram af Óseyrarbryggju í Hafnarfirði um níuleytið á föstudagskvöld og voru þrír menn í bílnum. Tilkynning frá Lögreglunni á höfuðborgarsvæðinu var send út um málið kl. 22:35 á föstudagskvöld og þar segir:
„Mjög alvarlegt slys varð í Hafnarfirði á tíunda tímanum í kvöld þegar bifreið fór fram af Óseyrarbryggju og hafnaði í sjónum. Tilkynning um slysið barst kl. 21.07 og fór fjölmennt lið viðbragðsaðila þegar á staðinn, en vinna á vettvangi stendur enn yfir.
Þeir sem voru í bílnum voru fluttir á slysadeild, en engar frekari upplýsingar um málið er hægt að veita að svo stöddu.“
Ekki er því vitað um líðan mannanna þriggja.
Vefútgáfa fjölmiðilsins Hafnfirðings var á vettvangi og tók ritstjórinn Olga Björt Þórðardóttir meðfylgjandi mynd. Fleiri myndir er að finna á vef Hafnfirðings.