Í færslunni segir að kópnum hafi verið komið til starfsmanna Húsdýragarðsins. Með færslunni mátti einnig sjá myndir af kópnum, meðal annars þar sem að lögreguþjónn heldur á honum.
Viðbrögð við færslu lögreglunnar voru misjöfn. Margir sögðu að ekki hafi verið rétt hjá lögreglunni að taka kópinn í burtu, móðir hans gæti hafa verið í grendinni, þó hún væri hvergi sjáanleg.
„Þvílíku mistökin! Þetta er Útselskópur, urturnar kæpa á þessum tíma, fela kópana á ís eða landi því þeir eru ósyndir fyrstu vikurnar, þær koma reglulega til að næra kópana en halda sig annars frá þeim ….. núna er hún eflaust að leita að kópnum sínum.“
„Er ekki í lagi þarna hjá ykkur hetjur? Urtan er að veiða til matar og kópurinn er ósyndur á þessum tíma. Þvílíkt rugl að taka afkvæmið í burtu.“
„Mamma hans er örugglega ađ leita ađ honum, fariđ međ hann aftur.“
„Það er ljótt að dæma hann í ævilanga prísund í alltof litlu fangelsi án þess að kanna aðra möguleika.“
Fjöldi ummæla í þessum dúr má finna fyrir neðan færslu lögreglustjórans. Margir eru á því máli að móðirinn hafi verið að veiða sér til matar og skilið kópinn eftir á meðan.
DV hafði samband við Thorkell Heiðarsson, sjávarlíffræðing hjá Húsdýragarðinum, sem sagði að óvenjulegt væri að finna kóp á þessum árstíma. Jafnframt sagði hann að kópurinn hafi ekki verið í góðu ástandi, en nú væri verið að vinna í því að bæta það. Thorkell sagði að mæðurnar ættu það til að slíta sig frá kópunum og þá væru þeir einir á báti.