Tilnefningar til Óskarsverðlauna fyrir árið 2019 voru afhjúpaðar rétt í þessu og hreppti Hildur Guðnadóttir útnefningu fyrir tónlist sína í kvikmyndinni Joker eins og margir hverjir höfðu spáð. Hildur er önnur íslenska konan sem hlotið hefur tilnefningu bandarísku akademíunnar en hin er Björk Guðmundsdóttir.
Hildur hefur átt mjög góðu gengi að fagna á þessu ári, fyrst fyrir tónlistina úr sjónvarpsþáttunum Chernobyl sem skilaði henni meðal annars Emmy-verðlaunum og Grammy-tilnefningu og undanfarið hefur verðlaunum og tilnefningum verið hlaðið á tónlist hennar fyrir Joker. Þá hlaut hún Golden Globe-styttuna fyrir Jókerinn á dögunum ásamt verðlaunum gagnrýnenda, Critic‘s Choice Awards, í nótt.
Óskarsverðlaunahátíðin er langstærsti viðburður tileinkaður kvikmyndum í Bandaríkjunum og er þetta í 92. skipti sem hátíðin fer fram. Telja sérfræðingar líklegt að Hildur verði Óskarssigurvegarinn í ár í flokki frumsamdar kvikmyndatónlistar. Þetta mun betur koma í ljós þann 9. febrúar þegar hátíðin verður haldin í beinni útsendingu í Dolby-leikhúsinu í Los Angeles.