Karlmaður á fertugsaldri hefur verið ákærður fyrir tilraun til manndráps. Þetta kom fram í fréttatíma stöðvar 2.
Maðurinn réðst að morgni 15. júní inn á heimili konu sem hann hafði leigt húsnæði af í skamman tíma. Samkvæmt heimildum fréttastofu Stöðvar 2 hótaði maðurinn konunni lífláti og gerði því næst ítrekaðar tilraunir til að veita henni lífshættulega áverka.
Maðurinn var vopnaður hníf.
Alls hlaut konan 11 skurði og stungusár. Maðurinn reyndi að veita henni áverka á höfði, háls og líkama en konunni tókst að verjast verstu hnífsstungunum. Hún náði svo að gera lögreglu viðvart og var í kjölfarið færð á slysadeild.
Maðurinn neitaði að afvopnast þegar lögreglu bar að garði og þurfti að kalla út sérsveit. Sérsveit þurfti að beita táragasi og gúmmískotum til að yfirbuga árásarmanninn. Maðurinn hafði áður komið við sögu lögreglu en var þó með hreint sakavottorð þegar árásin átti sér stað.
Maðurinn hefur nú verið ákærður fyrir tilraun til manndráps.
Konan var ekki í lífshættu eftir árásina en hlaut þó mikla áverka og hefur enn ekki náð fullum bata.