Steve Bannon, fyrrverandi ráðgjafi Donalds Trumps og stofnandi Breitbart, var í dag handtekinn í New York. Hann hefur verið ákærður fyrir fjársvik. Er hann ásamt öðrum sagðir hafa stolið fjármunum sem safnað hafði verið fyrir byggingu múrs á landamærum Bandaríkjanna og Mexíkó.
Samkvæmt ákærunni á Bannon að hafa tekið við á fölskum forsendum meira en einni milljón Bandaríkjadala frá hundruð þúsunda stuðningsmanna Donalds Trumps með því að hafa hópfjármagnað byggingu múrsins á landamærum Bandaríkjanna og Mexíkó. Hópfjármögnunin skilaði í heild um 25 milljónum dala, og er Bannon sagður hafa notað að minnsta kosti hundruð þúsunda til eigin og persónulegra nota.
Bannon er sjötti maðurinn nátengdur Trump Bandaríkjaforseta sem er handtekinn og ákærður af alríkislögreglunni á undanförnum árum. Hinir eru Roger Stone, Michael Flynn, Rick Gates, Paul Manafort og Michael Cohen.
Í ákærunni segir að meginþorri fjármunanna sem söfnuðust hafi vissulega farið í að byggja vegg en hundruð þúsunda hafi verið varið í persónuleg útgjöld Bannons. Þau útgjöld voru meðal annars vegna ferðalaga og gistinga, neysluvara og persónuleg kreditkorta útgjöld. Brian Kolfage sem einnig er ákærður fyrir aðild að málinu, á meðal annars að hafa eytt fjármunum söfnunarinnar í endurbætur á heimili sínu, skattgreiðslur, hlutagreiðslu í báti, lúxus jeppa, golfbíl, skartgripi, lýtaaðgerð og kreditkorta reikninga sína.
