Vaxandi útbreiðsla COVID-19 í nágrannalöndum er á meðal þess sem því veldur að skimun númer tvö og 5-6 daga sóttkví fyrir alla sem koma til landsins er nauðsynleg. Einnig hefur það komið fyrir að einstaklingar sem greinst hafa án veirunnar á landamærum hafa greinst með veiruna í annarri sýnatöku síðar. Skilgreiningin á öruggum löndum er orðin úrelt vegna vaxandi útbreiðslu veirunnar sem og vegna þess að margir sem koma frá áhættusvæðum en taka milliflug frá öruggum löndum gefa öruggu löndin upp sem brottfararstað.
Þetta var á meðal þess sem kom fram í máli Þórólfs Guðnasonar sóttvarnalæknis á upplýsingafundi dagsins. Smit sem komust framhjá skimun fyrr í sumar ollu tveimur hópsýkingum, þannig að tvö afbrigði veirunnar komust inn í landið. Við erum enn að glíma við veiruna úr annarri sýkingunni.
Hertar aðgerðir á landamærum taka gildi á miðnætti á miðvikudag. Þórólfur segir að þetta sé besta aðferðin til að koma í veg fyrir að veiran berist inn í landið en eins og áður verða nýju reglurnar endurskoðaðar síðar.
Frá síðasta fimmtudegi hafa 18 greinst með veiruna, þar af tveir í gær, annar var í sóttkví. Þórólfur segir að sveiflur séu milli daga en enn er um að ræða sama afbrigði veirunnar og glímt hefur verið við undanfarið. Tæplega 700 sjúklingasýni hafa verið greind daglega hjá veirufræðideildinni, en það þýðir að skimaðir hafa verið einstaklingar sem hafa talið sig vera með einkenni. Innan við 1% af þeim hafa greinst með veiruna. Helmingur þeirra sem hafa greinst frá því á fimmtudag voru í sóttkví.
Virk smit í landinu eru nú 118. Í sóttkví eru 528.
Fjöldi þeirra sem skimaður er á landamærum hefur farið vaxandi eða um 3.200 manns daglega. Í gær greindust 9 með veiruna á landamærum en þeir bíða allir mótefnamælingar, sem sker úr um hvort um virk smit eða ekki sé að ræða.
