Víðir Reynisson yfirlögregluþjónn segir áhyggjuefni hvað margir sem ekki eru í sóttkví séu að smitast af COVID-19. „Það segir okkur að samfélagssmit sé í gangi,“ segir Víðir en hann ræddi þessi mál í þættinum Vikulokin á Rás 1 í morgun.
Víðir sagði að þegar faraldurinn blossaði í upp í vetur hafi tekist að greina uppruna allra smita en nú viti sóttavarnayfirvöld ekki hvort þau séu að glíma við fyrsta stigs, annars stigs eða þriðja stigs smit. Það sé áhyggjuefni. Ekki sé vitað hvernig veiran komst til landsins aftur. Hins vegar séu yfirvöld hugsanlega að ná utan um þær hópsýkingar sem orðið hafa undanfarið.
Sjö greindust smitaðir í gær sem er nokkru færri en daginn áður en þá greindust 11.
Upplýsingafundur Almannavarna verður í dag kl. 14. DV mun flytja helstu fréttir af fundinum fyrir þá sem ekki hafa tök á að fylgjast með honum í beinni útsendingu.
