„Það er óhætt að segja að neyðarástand hafi skapast fyrir stuttu þegar mikill vatnsleki varð í turni Skálholtsdómkirkju. Kirkjuráð brást mjög hratt við þessari stöðu og samþykkti í síðustu viku að skipt yrði út þaki og allt ytra byrði kirkjunnar yrði endurnýjað.“

Þetta kemur fram á vef Skálholtsdómkirkju. Flutningur sögufrægs bókasafns úr turnherbergjunum yfir í Gestastofu mun hefjast sem fyrst vegna aðstæðnanna. Á umræddu safni er að finna marga merkilega gripi meðal annars bækur sem prentaðar voru í Skálholti á seinni hluta 17. aldar.

„Þakrennur, sem liggja inni í turni biluðu á klukkuloftinu og þar safnaðist upp vaðdjúpt vatn. Úr því lak niður á næstu hæðir turnsins þar sem hið sögufræga og merkilega bókasafn hefur verið geymt í áratugi. Það var Kristján biskup sem kom að þessu og verður að teljast mildi að ekki lak á sjálfar bækurnar.“

„Steinflísarnar á þakinu eru úr sér gengnar og þekjan er öll mosagróin. Lengi hefur lekið í turninum og niður í kirkju og hefur legið fyrir ástandsskoðun sem var síðast uppfærð í vetur. Hún hljóðar uppá nær eitt hundrað milljónir króna í heild með þeim lagfæringum sem þegar höfðu verið ákveðnar í sumar.“

Oft hefur verið rætt um flutningin á safninu en nú er ætlast til að hann fari fram sem fyrst. Undirbúningur er hafinn, bæði til að hægt sé að undirbúa bækurnar og pakka þeim og einnig koma upp varanlegri aðstöðu í Gestastofunni

Sjálfboðaliðar munu fá tækifæri til að koma að flutningunum, en samkvæmt fréttinni er hópur fólks sem lengi hefur beðið eftir verkefninu.