„Vissulega geta orðið slys og hundar tapað lífi sínu. Það er ótrúlega sorgmætt,“ segir kona sem Kristjón Kormákur Guðjónsson telur ljúga til um dauða tíkur sonar hans. „Að þurfa að taka mál til hæstu hæða í fjölmiðlum með nafni, heimilisfangi og hótunum segir kannski mest um manninn sjálfan. Áhugavert að sonurinn hefur ekki deilt frétt föður síns. Því miður hafa fjölmiðlar ekki mátt til að endurheimta líf þó nóg sé fjallað um dauða, og það er þannig líka í þessu tilfelli. Votta samúð og óska þeim feðgum alls hins besta.“ Þá bætir hún við: „Það eru alveg mörg dæmi um að fólk hafi fyrirfarið sér eftir opinberar aftökur í fjölmiðlum en það er samt bara allt í lagi að setja svona bolta af stað?“
DV sagði frá því fyrr í kvöld að Kristjón Kormákur, ritstjóri hjá Fréttablaðinu og Hringbraut, birti færslu á Facebook síðu sinni þar sem hann greindi frá því að hundur sonar hans sé týndur.
Þegar þessi frétt er skrifuð hafa 875 deilt færslunni.
Í færslunni segir Kristjón frá því að sonur hans, Gabríel, hafi eignast sinn besta vin – tíkina Flóru – eftir að hafa passað börn fyrir konu út á Austurlandi. Vegna húsnæðisaðstæðna gat hundurinn ekki dvalið hjá syni Kristjóns þangað til fyrir stuttu. Þá hafi sonurinn beðið um að fá Flóru aftur frá konunni, en fengið skilaboðin:
„Flóra varð fyrir bíl í morgun, hundagirðingin fauk aðeins til í rokinu í morgun og þau sluppu öll út, það var keyrt á Flóru, ég brunaði með hana til dýralæknis en hún dó hjá dýralæknum. Ömurlegt, ég er alveg í rusli yfir þessu.“
Í skilaboðum sem Kristjón sendi til konunnar í kvöld segir:
„Ef ekkert gerðist fyrir Flóru, skal ég koma að ná í hana. Ég skal jafnframt eyða út status um þetta allt saman og það verða engir frekari eftirmálar. Ef þú heldur þessu til streitu neyðist ég til að kæra þig fyrir þjófnað til lögreglu, einnig til síðarnefndar hrfí. Ef ég eyði mínum status þá hverfa allir hinir. Óska eftir svari sem fyrst. Eins og ég sagði, ef þú lætur mig fá Flóru, verða engir frekari eftirmálar.“
Bæði konan og Kristjón staðfesta við DV að hann hafi sent henni þessi skilaboð.
Eins og Dv.is sagði frá fyrr í kvöld fannst Kristjóni og syni hans grunsamlegt að tíkin hafi orðið fyrir bíl í fáfarinni sveit, en konan býr nú á Norðurlandi.
„Gabríel var niðurbrotinn. Mér fannst þetta ekki trúverðugt í ljósi fyrri samskipta. Ég hringdi í alla dýralækna á Akureyri og á Húsavík og víðar. Enginn kannaðist við að hafa fengið smáhund inn á borð til sín eða sögu í þessa veru.
Ég hafði samband við lögreglu, engin tilkynning heldur á þeirra borði.“
Þá segir Kristjón að þeir hafi ekki getað fengið neitt vottorð frá dýralækni og að konan sé treg til að svara spurningum varðandi málið.
Færsla Kristjóns hefur vakið mikla athygli. Fjöldi manns hefur deilt frásögninni og ummælakerfið er logandi:
„Ömurlegt biðijð þessa konu um að vísa ykkur á líkamsleifarnar af Flóru ella kæra hana fyrir þjófnað ef hún getur það ekki.“
