Engin smit af kórónuveirunni greindust hér á landi síðasta sólarhring, þriðja sólarhringinn í röð. 318 sýni voru tekin, 278 hjá Íslenskri erfðagreiningu og 40 á veirufræðideildinni.
Þórólfur Guðnason sóttvarnalæknir sagði á upplýsingafundi dagsins að vel hafi gengið að hemja faraldurinn og stefnt væri að því að fara hraðar í afléttingar á samkomubanni en áætlað var. Tilkynna átti um næstu afléttingar um mánaðamótin en það færist fram til 25. maí.
Þegar hefur verið tilkynnt að sundstaðir mega opna 18. maí. Búast má við því að fjöldatakmarkanir verði á sundstaðina en ekki liggur fyrir hámarksfjöldi. Vinnuhópur vinnur í samstarfi við rekstraraðila að því að útfæra reglur. Stefnt er að því að allir sundstaðir geti opnað á sama tíma.
Þórólfur var spurður hvers vegna sundstaðir megi opna fyrr en líkamsræktarstöðvar og sagðist hann telja að mun meiri smithætta væri á líkamsræktarstöðvum. Þar væru fleiri snertifletir og meiri nánd. Ennfremur drepi klórinn veiruna.
