„Auðvitað á að nýta árangurinn gegn kórónuflensunni til að opna landið strax aftur. Ef það væri gert nú myndi það vekja heimsathygli og laða hingað frelsisþyrsta ferðamenn sem kæmust hvergi annað. Íslendingar þyrftu áfram að sýna ýtrustu aðgát í langan tíma, en ávinningurinn af því að gefa ferðaiðnaðinum tækifæri á að berjast fyrir lífi sínu gæti orðið margfaldur ef hrunið yrði
umflúið,“ segir Jóhannes Loftsson, formaður Frjálshyggjufélagsins, í grein í Morgunblaðinu í dag.
Segir hann stjórnvöld vera að rústa efnahagslífi þjóðarinnar og segir stefnuna í sóttvarnamálum í viðbragði við COVID-19 vera afleik aldarinnar. Jóhannes segir stefnu Svía, sem hafa látið faraldurinn að miklu leyti flæða yfir landið og stefna að hjarðónæmi, vera réttu leiðina. Kórónuveiran sé enda á pari við inflúensu og dánartíðni um 0,1%.
Jóhannes segir stjórnvöld hafa falið lækni að stýra efnahagsmálum þjóðarinnar, og á þar við Þórólf Guðnason sóttvarnalækni. Efnahagspakkarnir séu skammtímaaðgerðir sem feli ekki í sér neina lausn og geri ástandið til framtíðar verra:
„Ríkisstjórn Íslands hefur flúið ábyrgðina sem fylgir því að stjórna og falið lækni efnahagsstjórnina. Fyrir vikið eru allar aðgerðir nú eingöngu líknarmeðferð á sjúklingi sem mun deyja ef hann fær ekki súrefni. Eina leiðin til að bjarga Íslandi frá öðru hruni er að fólk láti í sér heyra og minni stjórnmálamenn á að þeir munu verða dregnir til ábyrgðar fyrir þennan nýja afleik aldarinnar. Sannleikurinn mun koma í ljós. Enn er von um að hægt sé að komast hjá harmleiknum. En til þess að svo verði þarf fólk að rísa upp og sýna viðspyrnu og láta í sér heyra strax, því eftir að sjúklingurinn er dauður verður honum ekki bjargað lengur.“
Björn Bjarnason, fyrrverandi ráðherra og sjálfstæðismaður, gerir grein Jóhannesar að umtalsefni í pistli á vefsíðu sinni. Björn er ekki sammála Jóhannesi. Hann bendir á einfalda staðreynd:
„Það er góðra gjalda vert að opna Ísland sem fyrst. Hvert á hins vegar að fljúga eftir „ferðaþyrstum ferðamönnum“ ef þeir eru allir lokaðir inni í eigin löndum?“
Björn segir Jóhannes vera ósannfærandi í málflutningi sínum og honum þykir sérkennilegt að frjálshyggjuformaðurinn hóti íslenskum ráðamönnum einhvers konar byltingu.
Þórólfur Guðnason sóttvarnalæknir hefur áður bent á að hömlur á ferðalög til Íslands séu ekki orsakavaldur að hruni ferðaþjónustunnar því önnur lönd séu hvort eð er lokuð og ferðalög liggi niðri í heiminum að mestu.
