Gífurleg vonbrigði hellast nú yfir marga aðstandendur heimilisfólks á hjúkrunarheimilinu EIR eftir að staðfest var í dag að kona sem lá á brota- og endurhæfingardeild heimilisins reyndist smituð af kórónuveirunni. Niðurstöður voru óljósar framan af því við fyrstu sýnatöku greindist vægt smit. Önnur sýnataka reyndist neikvæð en þriðja sýnataka staðfesti að konan væri með COVID-19. Kom þetta fram í fréttum Stöðvar 2 í kvöld.

Öll deildin, þ.e. brota- og endurhæfingadeild, var sett í sóttkví.

Á þriðju hæð byggingarinnar er almenn hjúkrunardeild og þar hefur verið heimsóknabann síðan snemma í mars. Bannið verður framlengt til 11. maí hið minnsta.

Á öðrum hjúkrunarheimilum verða heimsóknir leyfðar að nýju á mánudag en er þá yfirleitt miðað við að íbúi geti aðeins fengið einn gest í heimsókn.

Aðstandandi heimilismanns á EIR fékk símtal frá deildarstjóra hjúkrunarheimilisins í gær þar sem honum var tilkynnt um að búið væri að framlengja heimsóknabannið vegna Covid-19 tilfellis á fjórðu hæðinni. Aðstandandinn varð fyrir miklum vonbrigðum og skrifar um málið í Facebook-hópnum „Verndum veika og aldraða“:

„Ég sem var fullur tilhlökkunar og búinn að panta tíma til að heimsækja ömmu mína, sem er reyndar og kannski sem betur fer á 3. hæðinni. Er auðvitað mjög vonsvikinn og vona að ég eigi eftir að fá tækifæri til að kveðja hana og eiga með henni einhverja stund áður en hún yfirgefur þennan heim.“

Í dag var þó ekki staðfest að heimsóknabannið yrði framlengt þar sem ekki lá ljóst fyrir að konan væri með COVID-19. Það hefur nú hins vegar verið staðfest eins og fyrr segir.