Þrátt fyrir að hafa tilkynnt í gær að leitinni af Söndru Líf Long hefði verið frestað til morguns hófst leit að nýju í gærkvöldi. Lögregla hefur nú skýrt hvers vegna.

Tveir vegfarendur höfðu samband við lögreglu eftir að hafa talið sig sjá torkennilegan hlut í sjónum skammt frá landi. Vegfarendur voru á ferð skammt frá þeim stað sem bifreið Söndru fannst. Lögreglan fékk tilkynningu um þetta klukkan hálf tíu í gærkvöldi og var þá ákveðið að kalla til leitarflokka og báta frá Landsbjörg. Þyrla Landhelgisgæslunnar tók einnig þátt í leitinni.

Á þessum tíma kvölds var háflóð á staðnum og nokkur sjór. Leitin reyndist árangurslaus og var hætt laust eftir klukkan eitt í nótt.

Skipulag leitarinnar í dag verður með sama hætti og í gærdag auk þess sem drónar verða nýttir til leitar ef veður leyfir.