Banaslys varð í miðbænum í gær er maður fæddur árið 1992 féll niður til jarðar af fjórðu hæð á fjölbýlishúsi. Talið maðurinn hafi verið verið að klifra utan á húsinu.

Lögregla hefur ekki gefið út tilkynningu um málið en heimildir DV um það eru öruggar.

Hafin er umræða um atvikið á Facebook. Margir kveðja unga manninn á Facebook-síðu hans. Ein kona segir:

Ég á óteljandi minningar af þér og hversu frábær þú varst, þó svo að við höfðum ekki mikið hist undanfarin ár, áttirðu alltaf stóran stað í hjartanu mínu og alltaf einn af mínum bestu.

Margar kveðjur eru í svipuðum anda, fólk minnist dýrmætra stunda með hinum látna þegar honum vegnaði vel í lífinu, en að slitnað hafi upp úr samskiptum í seinni tíð.

Uppfært – Tilkynning frá lögreglu: Eftirfarandi tilkynning hefur borist frá Lögreglunni á höfuðborgarsvæðinu um atvikið:

„Lögreglan á höfuðborgarsvæðinu rannsakar nú andlát karlmanns á þrítugsaldri. Maðurinn fannst mikið slasaður við hús í miðborg Reykjavíkur í fyrrinótt og var fluttur á slysadeild. Hann lést svo á Landspítalanum um miðjan dag í gær. Rannsókn lögreglu beinist m.a. að því með hvaða hætti maðurinn féll fram af húsinu.

Ekki er hægt að veita frekari upplýsingar um málið að svo stöddu.“