Ef allt fer á versta veg gætu þrjátíu refsidómar fyrnst á árinu. Í fyrra fyrndust 16 refsidómar en árið á undan voru þeir 35. Fangelsismálastofnun vinnur nú samkvæmt neyðarstigi viðbragðsáætlunar og því er dæmt fólk ekki tekið inn til afplánunar nema í ýtrustu neyð og þá aðeins þeir sem teljast hættulegir umhverfinu.

Fréttablaðið skýrir frá þessu í dag og vísar í svar Fangelsismálastofnunar við fyrirspurn blaðsins.

Fram kemur að um 600 manns séu nú á boðunarlista stofnunarinnar en voru 552 við síðustu áramót. 86 prósent þeirra eiga eftir að afplána stutta dóma, það er eitt ár eða skemur. Rúmlega fimmtíu eru farnir úr landi, aðallega útlendingar sem hlutu dóma fyrir skjalafals og brot á útlendingalögum.

77 hafa fengið heimild til að ljúka afplánun með samfélagsþjónustu en verr gengur en áður að útvega þeim verkefni en áður vegna neyðarstigs almannavarna og samkomubanns.