Deilur tveggja kornungra manna um hvort dömurnar ættu að ganga fyrir í biðröð fyrir utan salerni á skemmtistað leiddu til blóðugra átaka. Ákærði í málinu var aðeins rétt tvítugur þegar atvikið átti sér stað, í nóvember árið 2017, en mjög hefur dregist að rétta í málinu.
Atvikið átti sér stað á skemmtistað í Reykjavík. Var ungi maðurinn ákærður fyrir að hafa slegið mann með glerglasi í andliti svo glasið brotnaði við höggið, og í beinu framhaldi slegið hann með tveimur til þremur hnefahöggum í andlitið svo hann féll í gólfið. Af árásinn hlaut brotaþoli marga skurði í andlitið sem sauma þurfti með tuttugu og einu spori; skurði á enni, nefi og yfir vörum.
Maðurinn er jafnframt ákærður fyrir aðra líkamsárás í apríl árið 2018, að hafa slegið mann með flötum lófa í andlitið og skömmu síðar slegið hann með glerflösku í hnakkann. Af árásinni hlaut brotaþoli skurð á hnakkann sem sauma þurfti með fórum sporum.
Varðandi fyrra atvikið þá var kveikjan að því stuttar deilur mannanna um hvort konur ættu að hafa forgang að salerninu á skemmtistaðnum. Brotaþoli sveif á ákærða með þessa fullyrðingu og eftir orðaskipti þeirra skallaði brotaþoli hinn ákærða. Ákærði bar við sjálfsvörn en dómurinn mat að viðbrögð hans hefðu verið langt fram úr hófi. Báðir mennirnir voru mjög ölvaðir.
Skaðabótakröfum á hendur ákærða var vísað frá dómi vegna formgalla en hann var dæmdur í átta mánaða skilorðsbundið fangelsi fyrir þessar tvær líkamsárásir. Hann þarf að greiða nokkuð á aðra milljón samtals í sakarkostnað og málsvarnarlaun.
Dómurinn var kveðinn upp í Héraðsdómi Reykjavíkur í gær.
