Í nýjasta tölublaði Fréttablaðsins kemur fram að eldri íslensk kona, með undirliggjandi sjúkdóm, sé látin vegna COVID-19 sjúkdómsins. Hún lést í gær, mánudaginn 23. mars, og var þar af leiðandi fyrsti Íslendingurinn til að látast af veirunni sem herjað hefur á heiminn undanfarna mánuði.

Fréttablaðið hafði samband við Svandísi Svavarsdóttur, heilbrigðisráðherra, en hún vildi ekki tjá sig um málið að svo stöddu. Það sama má segja um Þórólf Gunnarsson, sóttvarnarlækni.

Líkt og komið hefur fram í fjölmiðlum er um annað andlátið að ræða hérlendis, en ástralskur ferðamaður á Húsavík lést vegna veirunnar í seinustu viku.

Líkt og flestum er kunnugt ríkir nú samkomubann sem á við um allar samkomur þar sem að fleiri en tuttugu manns koma saman. En samkvæmt nýjustu upplýsingum hafa verið greind 588 smit af veirunni hérlendis. Þau gætu þó verið talsvert fleiri vegna skorts á sýnatökupinnum.

Uppfært klukkan 07:50

Landspítalinn birti tilkynningu á heimasíðu sinni nú í morgun þar sem fram kemur að liðlega sjötug kona hafi látist á smitsjúkdómadeild spítalans af völdum COVID-19 veirunnar. Fram kemur að konan hafi áður glímt við langvarandi veikindi.