Síminn hefur lagt fram kæru til Fjölmiðlanefndar vegna þess að norsku þættirnir Exit eru opnir öllum. Þættirnir eru stranglega bannaðir börnum en þar má meðal annars sjá fíkniefnaneyslu og ofbeldi. Morgunblaðið segir frá þessu í dag.

Það er ef til vill kaldhæðnislegt að í kynningu um þáttinn á vef RÚV segir:

„Norska sjónvarpsþáttaröðin Exit sem fjallar um úrkynjaðan og siðspilltan lífstíl manna úr fjármálaheiminum hefur orðið til þess að kvörtunum góðborgara hefur rignt yfir Norska ríkissjónvarpið NRK frá frumsýningu þeirra síðasta haust.“

Í frétt Morgunblaðsins kemur fram að blaðið hafi kæruna undir höndum og þar sé bent á að engar aðgangsstýringar séu á spilara Ríkisútvarpsins. Þess vegna geti hver sem er, börn jafnt sem fullorðnir, nálgast efnið þó það sé rauðmerkt og ekki ætlað börnum.

Lög um þetta virðast vera nokkuð skýr, en í 38. grein fjölmiðlalaga segir meðal annars:

„Heimilt er að miðla hljóð- og myndmiðlunarefni eftir pöntun sem ekki er talið við hæfi barna að því tilskildu að tryggt sé með viðeigandi tæknilegum ráðstöfunum að börn hafi ekki aðgang að því.“