Landsnet hefur undirbúið viðbrögð vegna lægðarinnar sem kemur yfir landið á morgun og verður viðvarandi fram á fimmtudag.

„Spáð er djúpri lægð sem kemur yfir landið á morgun og verður viðvarandi fram á fimmtudag. Með lægðinni sem stefnir á Reykjanes á morgun, þriðjudag, eykst veðuráraun á raforkukerfið. Eldingahætta verður með meginskilum lægðarinnar í fyrramálið einkum suðvestan- og sunnanlands. Með vestanáttinni í kjölfarið er reiknað með umtalsverðu álagi um sunnan og vestanvert landið af völdum vinds, ísingar og seltu sem verður viðvarandi fram á fimmtudag,“ segir í tilkynningunni.

Þá segir að þegar sé búið að kortleggja hvaða landsvæði eru útsett fyrir seltu. Nú þegar er unnið að undirbúningi hreinsunar í samstarfi við slökkvilið á svæðunum sem um ræðir. Landsnet hvetur landsmenn til að fylgjast með tilkynningum á heimasíðu Landsnets, Facebook og í Landsnetsappinu.