Lögreglan á höfuðborgarsvæðinu hefur upplýst rán sem var framið í fyrirtæki í miðborginni í byrjun mánaðarins, en þar var starfsmanni ógnað og hótað með mjög grófum hætti áður en ræninginn komst undan með talsvert af reiðufé.
Í tilkynningu frá lögreglu segir að starfsmanninum í fyrirtækinu hafi eðlilega verið mjög brugðið, en hann hafi brugðist hárrétt við í afar erfiðum aðstæðum. Ræninginn, sem er karlmaður í kringum þrítugt, var handtekinn fyrr í vikunni og játaði hann verknaðinn við yfirheyrslu hjá lögreglu. Tekist hefur að endurheimta stóran hluta af ránsfénu.
Lögregla segir að í upphafi málsins hafi verið á mjög litlu að byggja við rannsóknina, en strax voru sporleitarhundar kallaðir út til aðstoðar. Þá var farið yfir mikið af myndefni úr eftirlitsmyndavélum í miðborginni, bæði myndavélum lögreglu og fyrirtækja, og það varð til þess að lögreglan fékk vísbendingar sem að lokum leiddu til handtöku ræningjans.