Athafnakonan Michele Ballarin er stödd hér á landi og fundar um mögulega endurreisn WOW air.
Þetta herma heimildir Túrista. Skiptastjórar WOW air riftu kaupum Ballarin og félags hennar, Oasis Aviation Group, á flugrekstrartengdum eignum úr þrotabúi WOW í lok júlímánaðar.
Þrátt fyrir það er Ballarin enn sögð vinna að stofnun nýs flugfélags á grunni WOW air, en samkvæmt heimildum Túrista fundar hún með einstaklingum úr íslenskri ferðaþjónustu og viðskiptalífi hér á landi. Almannatengillinn Gunnar Steinn Pálsson, sem unnið hefur með Ballarin, vildi ekki tjá sig um málið þegar Túristi leitaði eftir því en auk hans hefur lögmaðurinn Páll Ágúst Ólafsson lagt henni lið.
Í umfjöllun Morgunblaðsins í júlímánuði kom fram að stefnt væri að því að WOW hefði tíu til tólf vélar í sinni þjónustu innan tveggja ára. Ballarin sagði í samtali við blaðið að nýtt félag hygðist nota vélar frá Airbus og einblína á áfangastaði sem voru í leiðakerfi WOW air.