Eldur kviknaði í ruslatunnum í Furulund í Heiðmörk í dag. Vegfarendur létu slökkvilið vita og reyndu að slökkva í tunnunum en réðu ekki við það. Slökkvibíll var sendur úr slökkvistöðinni í Tunguhálsi og náðu mennn tökum á eldinum mjög fljótlega. Eldurinn var í rusli sem hafði verið í steyptu tunnuskýli.
Í tilkynningu Slökkviliðsins á höfuðborgarsvæðinu um málið segir:
Þarna hefði getað orðið mikill gróðureldur vegna þess hve þurrt er á svæðinu. Við minnum á að Almannavarnadeild Ríkislögreglustjóra hefur gefið út að á Vesturlandi er óvissustig vegna mögulegra gróðurelda. Á höfuðborgarsvæðinu gildir hið sama. Því beinum við því til almennings að nota alls ekki einnota grill á víðavangi eða í trjálundum á útivistarsvæðum. Eins er ekki leyfilegt að nota útiarna eða vera með bálkesti.