Helga Dögg Sverrisdóttir kennari liggur undir þungri gagnrýni vegna skrifa sinna um grunnskólanemendur. Í dag birtist ályktun frá Jafnréttisnefnd KÍ þar sem málflutningi hennar er mótmælt. Stundin vekur athygli á þessu en blaðið hefur áður farið yfir greinaröð Helgu Daggar á Kjarnanum. Í greinum sínum hefur Helga Dögg haldið því fram að nemendur beiti kennara ofbeldi og að þeir ljúgi ofbeldi upp á kennara sína, líkamlegu og kynferðislegu. Helga Dögg hefur ekki lagt fram gögn til að styðja mál sitt. Fram kemur í frétt Stundarinnar að Ragnar Þór Pétursson, formaður Kenntarasambandsins, segist vonast til að Helga Dögg leggi fram gögn til stuðnings máli sínu.

Ályktun jafnréttisnefndar Kennarasambandsins um skrif kennarans er eftirfarandi:

Jafnréttisnefnd Kennarasambands Íslands mótmælir málflutningi Helgu Daggar Sverrisdóttur grunnskólakennara í Kjarnanum 31. maí síðastliðinn um falskar ásakanir nemenda um meint ofbeldi kennara. Nefndin telur málflutning kennarans vera þess valdandi að grafa undan trausti nemenda og forráðafólks til kennara og skólakerfisins. Umræddur málflutningur er illa rökstuddur og gengur í bága við skyldur skólakerfisins við barnavernd og þá frumskyldu kennara að valdefla nemendur, virða þá og vernda. Nauðsynlegt er að samfélagið í heild hjálpist að við að bjóða ungu fólki upp á góð uppeldisskilyrði þar sem hlúð er að siðferðisvitund og virðingu. Ef upp koma alvarleg mál er mikilvægt að verkferlar séu skýrir og allir, starfsfólk skóla, forráðafólk og nemendur þekki hvernig beri að bregðast við.

F.h. jafnréttisnefndar,
Hanna Björg Vilhjálmsdóttir forkona