Hanna Björk Þrastardóttir, móðir Jóns Þrastar Jónssonar, sem hvarf sporlaust í Dublin þann 9. febrúar, er algjörlega ósammála þeirri kenningu að slæmur félagsskapur sé orsakavaldur í hvarfi sonar hennar. Fram kemur í breska miðlinum The Sun að systir Jóns, Anna Hildur, hafi ráðið einkaspæjara til að leysa gátuna og virðist unnið út frá þeirri kenningu að Jóni hafi verið ráðinn bani þar sem hann hafi lent í slæmum félagsskap.
Þessu er Hanna Björk gjörsamlega ósammála og hún er reið yfir ummælum Önnu Hildar: „Ég líð ekki að það sé talað svona um son minn,“ segir Hanna Björk í stuttu viðtali við DV. Hanna Björk var í viðtali við DV um málið í vor, sem og á sjónvarpsstöðinni Hringbraut, en hún vildi helst ekki tjá sig um það aftur. Hún telur sig hins vegar knúna til að mótmæla því sem haft er eftir Önnu Hildi og að hennar mati tilgangslausri ráðningu á einkaspæjara:
„Sonur minn slóst ekki og hann átti aldrei í útistöðum við nokkurn mann. Víst tapaði hann peningum á hótelinu þarna um nóttina en það var ekkert tilefni til að lenda í átökum og enginn átti að þurfa að eiga sökótt við hann út af því,“ segir Hanna.
Hanna telur að sonur sinn hafi fyrirfarið sér í stundarbrjálæði enda hafi hann verið í miklu uppnámi er hann fór út af hótelinu í Dublin að morgni 9. febrúar, stuttu eftir að unnusta hans, Jana Guðjónsdóttir, kom á hótelið.
Hanna hefur kallað eftir því að Jana tjái sig með hreinskilnari hætti um samskipti hennar og Jóns áður en hann hvarf en Jana hefur látið sem þau hafi verið slétt og felld. Hanna útilokar þó alls ekki að einhver annar kunni að hafa komið Jóni í uppnám og hún vill undirstrika að það sé engum að kenna hafi Jón tekið þá afdrifaríku ákvörðun sem hann virðist hafa tekið. Ákvörðunin og ábyrgðin hafi verið hans.
Hanna viðurkennir að mikið ósætti sé í fjölskyldunni eftir hvarf Jóns þó hún vilji ekki tjá sig mikið um það opinberlega. Ljóst sé að fleiri en hún séu ósáttir við þá ákvörðun að ráða einkaspæjara og ósáttir við þá nálgun að hvarf Jóns sé af mannavöldum. Ekkert hafi heldur komið fram í rannsókn lögreglu sem bendi til þess.
Systir Jóns Þrastar tjáir sig – Slæmur félagsskapur líklegasta orsökin
Móðir Jóns Þrastar telur að hann hafi tekið afdrifaríka ákvörðun