Reynir Traustason, fyrrverandi ritstjóri DV, segir að misnotkun sumra starfsmanna RÚV á aðstöðu sinni sé vatn á myllu andstæðinga stofunarinnar. Reynir segist ekki sérstakur andstæðingur RÚV en telur þetta ámælisvert.

„Það er ljóður á ráði Ríkisútvarpsins að starfsmenn eru gjarnan að hossa hver öðrum í þáttum stofnunarinnar. Þar er gjarnan gagnvirkt samstarf um að gera hvert annað að frægðarmennum. Sláandi dæmi um þetta mátti sjá í Vikunni hjá Gísla Marteini í gær þar sem Egill Helgason var enn og aftur dreginn á flot ásamt syni sínum. Nenni ekki að röfla yfir söngvaranum með svuntuna og aulahrollinun sem fylgdi innihaldsleysinu og yfirborðsmennskunni,“ segir Reynir á Facebook.

Hann segir að flestir fjölmiðlar forðist að gera starfsmenn sína fræga. „Á DV var í tíð Jónasar Kristjánssonar og síðar bannað að gera fólk að frægðarmennum á síðum eigin blaðs. Innan RÚV og reyndar víðar á fjölmiðlum ríkir að þessu leyti siðleysi. RÚV á marga og öfluga óvini. Misnotkun starfsmanna er vatn á myllu þeirra. Tekið skal fram að ég hef yfirleitt gaman að þætti Gísla Marteins,“ segir Reynir.