Almannavarnir hafa ákveðið að appelsínugul viðvörun gildir á Norðvesturlandi. Þá er fólk beðið um að vera alls ekki á ferli auk þess sem ölllu innanlandsflugi hefur verið aflýst í dag og í kvöld. Það er fréttastofa RÚV sem greinir frá þessu.
Í frétt Ríkisútvarpsins kemur einnig fram að erfiðlega gengur að koma rafmagni aftur á. Á Hvammstanga er enn rafmagnslaust og samkvæmt íbúum á svæðinu er símasamband og netsamband þar lélegt. Samkvæmt upplýsingum frá Rarik var straumlaust í Dalabyggð, það er Búðardal, Laxárdal, Suður Dölum og á Skógarströnd vegna viðgerðar um fimm leytið í dag.
Landsnet tilkynnti fyrr í dag að reynt hafi verið að koma Húsavíkurlínu aftur í gagnið en allt kom fyrir ekki. Steinunn Þorsteinsdóttir, upplýsingafulltrúi Landsnets, sagði við fréttastofu RÚV í dag að Dalvíkurlínan væri í forgangi þar sem ekki hefur verið rafmagn í gegnum hana frá því klukkan átta í morgun.