Þingmaður Pírata, Björn Leví Gunnarsson, hefur nýlega opnað vefsvæði þar sem hægt er að rita nafnlausar sögur um spillingu í íslensku samfélagi. Hefur Björn núna tekið til við að endursegja sumar af sögunum sem honum hafa borist. Páll Vilhjálmsson, blaðamaður og kennari, er ekki hrifinn af þessu tiltæki Björns og hefur þetta að segja um spillingarsögurnar á bloggsvæði sínu:
„Allt eru þetta óstaðfestar ásakanir nafnleysingja. Gamla orðið er slúður en nýyrðið falsfréttir.“
Páll er lítt hrifinn af því framtaki að birta nafnlausar frásagnir um spillingu og skefur ekki utan af gagnrýni sinni á framtakið:
„Stjórnmálamenn eins og Björn Leví ná helst árangi í samfélagslegri ormagryfju. Enda safnar þingmaðurinn ormum.“
Þess má geta að sögurnar eru ekki birtar á vefsvæðinu sem Björn Leví stofnaði. Þar er móttaka fyrir sögurnar og sagt er að vettvangurinn sé hjálpartæki fyrir Pírata til að kortleggja spillingu. Björn velur síðan úr sögur til birtingar og í morgun birti hann eftirfarandi spillingarsögur í Morgunblaðinu:
„Ég varð vitni að því að tveir starfsmenn voru að stela vörum af lager. Ég tilkynnti þjófnaðinn og annar var rekinn en hinn var vel tengdur og hélt starfinu.“
„Ríkisstarfsmaður skrifaði áfengi sem matvæli á reikning vegna ferðalags, þegar ég kvartaði þá var ég tekinn úr ferðalagi sem ég átti að fara í.“
„Menn verða að tilheyra réttum flokki til þess að eiga séns á að fá pláss á bát.“
„Ég hef fengið skammir í vinnunni fyrir það sem ég skrifa á netið og skilaboð um að það sé fylgst með því sem ég segi.“
„Stærsti vinnuveitandinn á staðnum skipaði öllu erlendu vinnufólki að kjósa ákveðinn flokk í sveitarstjórnarkosningum eða það myndi missa vinnuna.“