Fyrirtaka verður fyrir Héraðsdómi Selfoss á fimmtudagsmorgun í máli Guðjóns Þórs Emilssonar sem ákærður er fyrir þjófnað upp á 14.748.224 krónur frá Björgunarfélagi Árborgar. DV hefur ákæruna undir höndum.

Guðjón var um árabil gjaldkeri Björgunarfélags Árborgar. Á tímabilinu 2010 til 2017 millifærði hann, samkvæmt ákæru, inn á eigin reikning og reikning eiginkonu sinnar misháar fjárhæðir, frá nokkur þúsund krónum upp í nokkur hundruð þúsund krónur hver færsla.

Enn fremur er Guðjón ákærður fyrir umboðssvik með því að hafa misfarið með kreditkot Björgunarfélags Árborgar til að kaupa í heimildarleysi vörur og þjónustu til eigin nota á tímabilinu 2014 til 2016. Þá er hann sakaður um heimildarlausar úttektir með kreditkortinu hjá byggingarvöruverslunum Byko og Húsasmiðjunni, sem og hjá Olíuverzlun Íslands.

Þá er Guðjón sakaður um að hafa leyft öðrum í heimildarleysi að nota eldsneytiskort björgunarfélagsins eða notað það sjálfur, svo hundruðum skipta nemur.

Í ákærunni er þess krafist að Guðjón verði dæmdur til refsingar og greiðslu alls sakarkostnaðar.