Samtökin Réttur barna á flótta hafa fengið lögmannsstofuna Rétt í lið með sér og ætla að kæra ríkislögreglustjóra, Útlendingastofnun og heilsugæslu höfuðborgarsvæðisins vegna albönsku konunnar sem var vísað úr landi á dögunum þrátt fyrir að vera á 37. viku meðgöngu. Þetta kemur fram á Facebook síðu samtakanna.
„Það er okkar markmið að standa vörð um réttindi barna sem og mannréttindi. Við viljum styrkja stöðu barna og fjölskyldna í viðkvæmri stöðu í landinu með beinum hætti. Við viljum vera málsvari þeirra sem hafa ekki efni á því að leita réttar síns“
Samtökin hafa tekið ákvörðun um að standa straum af kostnaði vegna málaferlanna. Markmið kærunnar er tvíþætt. Að albanska fjölskyldan fái viðurkennt að brotið hafi verið gegn mannréttindum þeirra og heilsu móður og barn stofnað í óþarfa hættu, og einnig að senda skýr fordæmisgefandi skilaboð til yfirvalda um að vinnubrögð líkt og þau sem í þessu máli voru viðhöfð, verði ekki liðin.
„Með auðmýkt þá biðjum við um stuðning við verkefnið og við minnum á reikningsnúmer okkar. Allt fé sem við söfnum fer í að styrkja réttarstöðu barna á flótta með beinum hætti“
Þeir sem vilja leggja samtökunum lið er bent á reikning þeirra : 545-26-8014 kt: 690719-0370