Breski fjölmiðilinn Daily Mail birti í gær myndband úr Reynisfjöru en í því virðist maður nokkur vera við dauðans dyr. Á meðan hlógu þeir sem tóku myndbandið dátt.
Myndbandið má sjá hér fyrir neðan. Það ku hafa verið tekið í síðasta mánuði. Á myndbandinu má sjá mann sem hafði klifrað upp í stuðlabergið en svo skellir heljarinnar alda á honum.
Maðurinn virðist þó ekki hafa slasast en hæglega hefði getað farið verr. Myndbönd sem þessi eru orðin nær daglegt brauð en tíðar fréttir hafa verið undanfarin ár af hrakningum ferðamanna við Reynisfjöru þar sem sjórinn leynir á sér og getur verið mjög hættulegur.
Aðvörunarskilti á staðnum virðist ekki þjóna tilgangi sínum nægilega vel og hvað eftir annað hefur verið vitnað um glæfraskap ferðamanna á svæðinu. Fyrir tæpum tveimur árum drukknaði þýsk kona á svæðinu er hún sogaðist út með briminu.
