Íslendingur á fertugsaldri, Ingólfur Steinar Ingólfsson, hefur verið handtekinn í Kambódíu samkvæmt fréttamiðlum þar. Kambódískir fjölmiðlar birta mynd af Ingólfi ásamt lögregluþjóni en þá mynd má sjá hér fyrir ofan.
Samkvæmt þeim fréttamiðlum týndi hann vegabréfi sínu þar í landi í maí en þrátt fyrir að hafa fengið aðstoð frá íslenska sendiráðinu þá óskaði hann ekki eftir vegabréfsáritun og var því ólöglega í landinu.
Auk þess ku hann hafa safnað skuldum á hóteli sínu. Í fjölmiðlum erlendis kemur fram að honum verði vísað úr landi fljótlega. DV gerði tilraun til að ná tali af Ingólfi án árangurs.
Ingólfur hefur ítrekað komist í kast við lögin á Íslandi. Undir lok árs 2017 var hann dæmdur í níu mánaða fangelsi sem var skilorðsbundið að hluta. Þá hafði verið tekinn ölvaður undir akstri en í blóði hans mældist amfetamín, metamfetamín og kannabis.
Í þeim dómi kemur fram að hann hafi ítrekað verið dæmdur fyrir ýmis brot, þó flest tengd fíkniefnum. Árið 2012 barði hann leigubílsstjóra. Sá hlaut bólguhellu og mar hægra megin í andliti eftir tvö þung högg í andlitið.