Samkvæmt heimildum DV er talsverður kurr meðal sumra starfsmanna Ráðhússins, nánar tiltekið karlkyns starfsmanna. Ástæðan er svokallað skvísupartý sem körlum er meinaður aðgangur að. Samkvæmið fer fram síðar í dag. Að sögn Huldu Gunnarsdóttur, upplýsingafulltrúa hjá Reykjavíkurborg, mun borgin greiða um 40 þúsund krónur fyrir rútu og útvega sal að kostnaðarlausu. Konurnar borga sjálfar fyrir áfengi en þær losna fyrr úr vinnu í dag en karlarnir.
Fyrrnefndur starfsmaður segir að þó að þetta sé ef til vill ekki stórkostlegt misrétti þá skjóti það þó skökku við þegar Reykjavíkurborg leggur mikla áherslu á jafnrétti. Þarna sé verið að hampa einu kyni umfram öðrum. „Í dag er haldið hið árlega „Skvísupartý Ráðhússins“, aðeins fyrir kvenkyns starfsfólk Ráðhússins, ekki er gert ráð fyrir fólki af öðrum kynjum enda boðspósturinn aðeins sendur á þær konur sem vinna í húsinu. Í „skvísupartýinu“ gerir kvenkyns starfsfólk Ráðhússins sér glaðan dag á vinnutíma, ekki er haldið sambærilegt partý fyrir þá karla sem vinna í húsinu, eða fólk sem hvorki skilgreinir sig karl né konu,“ segir heimildarmaður DV innan ráðhússins.
Hann segist alls ekki vera einn um það að þykja þetta fyrirkomulag óeðlilegt. „Kurr er í starfsfólki vegna þessa og þykir þetta fyrirkomulag skjóta skökku við á tímum jafnréttis og jafnræðis og eru ekki allir við eitt sáttir. „Það yrði nú eitthvað sagt ef karla færu einir í partý,“ sagði einn og fékk bágt fyrir, „Þetta hefur bara alltaf verið svona“ var svarað,“ lýsir heimildarmaður DV.
DV hafði samband við skipuleggjanda skvísupartýsins og fékk raunar sama svar. „Þetta hefur bara alltaf verið svona,“ svaraði Anna Karen Kristinsdóttir, móttökufulltrúi skrifstofu borgarstjóra, en vildi að öðru leyti ekki tjá sig um málið. Hulda Gunnarsdóttir svaraði þó fyrir samkvæmið. „Þessi veisla er á vegum þeirra kvenna sem vinna hérna í húsinu. Þetta er þannig í pottinn búið að við greiðum fyrir okkar vín sjálfar, mætum á staðinn, þurfum ekkert að greiða fyrir salinn. Það mesta sem er borgað undir okkur er ein rúta. Hvað varðar að körlum sé ekki boðið, það hefur aldrei verið þannig að neinn sé útilokaður. Körlum er frjálst að halda sitt boð. Við höfum alltaf haft allskonar viðburði þar sem öllum er boðið. Þetta hefur verið gert árlega fyrir konur,“ segir Hulda.
