Skipverjar Polar Nanoq héldu í heiðri minningu Birnu Brjánsdóttur á dögunum með því að setja blómsveig á leiði hennar. Thomas Möller Olsen, morðingi hennar, var skipverji á þeim togara en hann hlaut 19 ára fangelsisdóm í september.
RÚV greinir frá þessu og vitnar í grænlenska dagblaðið Sermitsiaq. Þar kemur fram að blómsveigurinn hafi komið til Íslands fyrir nokkrum vikum en áhöfnin lagði hann á leiði Birnu nýverið. Áhafnarmeðlimir ákváðu að gera þetta af sjálfsdáðum en vildu ekki hitta móður Birnu, Sigurlaugu Hreinsdóttur, þar sem þeir vildu ekki valda henni óþarfa sárindum.