Sigurður Pálsson, rithöfundur og eitt fremsta ljóðskáld landsins um árabil, er látinn, 69 ára að aldri. Sigurður lést á líknardeild Landspítalans í gær eftir erfið veikindi.

Sigurður Pálsson fæddist 30. júlí 1948 á Skinnastað í N-Þingeyjarsýslu. Hann lauk stúdentsprófi frá Menntaskólanum í Reykjavík og stundaði frönskunám í Toulouse og París og nam leikhúsfræði og bókmenntir í Sorbonne. Hann hefur einnig lokið námi í kvikmyndaleikstjórn.

Sigurður fékkst við ýmis störf í um ævina. Hann var fréttaritari, leiðsögumaður, kennari og vann við sjónvarp og kvikmyndir. Hann var forseti Alliance Française um skeið og formaður Rithöfundasambands Íslands. Einnig kenndi Sigurður ljóðlist við ritlistarbraut Háskóla Íslands.

Þekktastur varð Sigurður þó fyrir ritstörf sín. Hann sendi frá sér fjölmargar ljóðabækur og var talinn eitt frumlegasta og besta ljóðskáld þjóðarinnar. Ljóðabækur hans voru þýddar á mörg tungumál. Árið 2007 hlaut Sigurður Íslensku bókmenntaverðlaunin fyrir Minnisbók, endurminningar þar sem dregnar eru upp lifandi myndir af námsárum hans í Frakklandi.

Sigurður var valinn borgarlistamaður Reykjavíkurborgar á tímabilinu 1987-1990, honum var veittur riddarakross Orðu lista og bókmennta (Chevalier de l’Ordre des Arts et des Lettres) af menningarmálaráðherra Frakklands árið 1990, og Frakklandsforseti sæmdi hann riddarakrossi Frönsku heiðursorðunnar (Chevalier l’Ordre National du Mérite) árið 2007. Hann hlaut verðlaun Jónasar Hallgrímssonar á degi íslenskrar tungu 2016.
Eftirlifandi eiginkona Sigurðar er Kristín Jóhannesdóttir, kvikmyndaleikstjóri.