Þrumuveður gerði það að verkum að hætta þurfti leit í dag
Leit að sjö ára dreng sem skilinn var eftir í skóglendi á afskekktum stað á Hokkaido í Japan hefur enn engan árangur borið. Aðstæður til leitar hafa verið erfiðar og gerði þrumuveður í dag það að verkum að hætta þurfti leit.
Sjá einnig: Refsuðu drengnum og skildu hann eftir í skóginum: Leitin hefur engan árangur borið
DV fjallaði um málið í gær. Drengurinn, Yamato Tanooka, hafði hegðað sér illa, að mati foreldra hans og brugðu þeir á það ráð að refsa honum með því að skilja hann eftir. Þeir snéru við skömmu síðar en þá var drengurinn á bak og burt.
Fjölskyldan var í göngu um svæðið og tilkynntu foreldrar hans um hvarfið síðdegis á laugardag. Sögðu þeir fyrst að drengurinn hefði einfaldlega týnst – orðið viðskila – en viðurkenndu síðar að hafa skilið hann eftir.
Vitað er til þess að birnir halda til á svæðinu og því afar brýnt að drengurinn finnist sem fyrst. Hann var ekki klæddur til langrar útiveru og var auk þess matar- og drykkjarlaus.
„Nú eru þessir 72 tímar, sem eru mikilvægastir, liðnir,“ segir Satoshi Saito, sem stýrt hefur leitinni, við japanska fjölmiðla. „Útlitið er ekki bjart en það eina sem við getum gert er að halda áfram að leita,“ bætti hann við. Miklar rigningar hafa verið á svæðinu undanfarna daga og þá fer hitinn iðulega undir 10 gráður á næturna.