Fullyrt að eigandinn hafi verið handtekinn vegna gruns um íkveikju
Lögreglunni á Vesturlandi var tilkynnt laust fyrir klukkan fimm í morgun að ölvaður maður gengi berserksgang við Hótel Ljósaland í Dalabyggð. Lögreglan fór á vettvang en hálftíma síðar var tilkynnt að kviknað væri í hótelbyggingunni.
Sjá einnig: Eigandi Hótels Ljósalands handtekinn
Þetta kemur fram í tilkynningu frá lögreglunni. RÚV greindi frá því í morgun að eigandi hótelsins hefði verið handtekinn vegna gruns um að hafa kveikt í.
Í tilkynningu lögreglu kemur fram að slökkviliðin í Dalabyggð, Strandabyggð og Reykhólahreppi hafi verið kölluð út og var einn maður handtekinn á vettvangi grunaður um að hafa kveikt í byggingunni. Hann er í haldi lögreglunnar. Að sögn lögreglu er málið í rannsókn hjá rannsóknardeild Lögreglunnar á Vesturlandi. Engir gestir voru á hótelinu þegar kviknaði í byggingunni og enginn slasaðist.