Skólastjóri Salaskóla sagði Gunnar hættulega fyrirmynd – Gunnar viðurkennir að sportið sé ekki fyrir alla
„Mér finnst þetta bara vera barnalegt. Það er barnalegt að reyna að kenna einhverjum eins og mér, sem er að stunda mína íþrótt, um að einhverjir tveir strákar hafi verið að slást á skólalóð. Slagsmál hafa viðgengist helvíti lengi og langt fyrir mína tíð,“ segir bardagakappinn Gunnar Nelson í viðtali á vef MMAfrétta.
Þar vísar Gunnar í frétt DV.is þann 14. desember síðastliðinn þar sem greint var frá slagsmálum drengja á aldrinum tíu til ellefu ára í Salaskóla. DV ræddi við Hafstein Karlsson skólastjóra sem sagði að kenna mætti hrifningu á Gunnari Nelson um. Sagði hann það skelfilegt að svona viðbjóðsleg íþrótt eins og MMA væri hafin upp til skýjanna og að Gunnar væri hættuleg fyrirmynd.
„Þetta er hreinn viðbjóður og því miður er fullt af litlum drengjum sem horfa á þetta á vefnum án vitundar foreldra sinna. Þarna sjá þeir Gunnar Nelson sem hefur verið hafinn upp til skýjanna hér á landi fyrir þetta ofbeldi,“ sagði Hafsteinn sem bætti þó við að oft yrðu stympingar á milli drengja. „En hnefahögg beint í andlitið er eitthvað sem maður hefur ekki verið að sjá. Ekki svona eins og núna. Það er eins og þetta sé leyfilegt. Þetta er alvarlegt mál. Þessir krakkar horfa á þetta á netinu án þess að foreldrar þeirra viti. Þetta snýst bara um hnefahögg í andlitið. 10-11 ára strákar. Þetta er þessi aldur sem setur enga síu,“ sagði hann.
Gunnar opnar sig um ummæli Hafsteins í viðtalinu við MMA-fréttir og gefur hann lítið fyrir þau.
„Ég hef oft sagt það áður að það er kannski ekki fyrir alla að horfa á þetta sport. Foreldrar eiga að dæma um það eða stjórna því hvort börnin sín eigi að horfa á þetta ekki og hvort þau hafi þroska til að skilja hvað er að gerast. Að ætla að kenna Michael Schumacher um að einhver hafi keyrt of hratt niður í bæ er eins asnalegt og það hljómar,“ segir Gunnar Nelson meðal annars í viðtalinu.
