Fyrirsæta hefur verið harðlega gagnrýnd fyrir að birta mynd af sér berri að ofan í eyðimörkinni í Dubai. Hún þvertekur fyrir að hafa gert nokkuð rangt, þar sem hendur hennar „hylja brjóst“ hennar á myndinni.
Luana Sandien er 27 ára og frá Brasilíu. Hún er fyrirsæta og munu birtast myndir af henni í næsta tölublaði danska Playboy. Hún nýtur einnig vinsælda á Instagram og deildi þar myndum af sér berbrjósta í eyðimörkinni í Dubai.
Myndirnar féllu ekki vel í kramið hjá netverjum sem sökuðu hana um að vanvirða strangar reglur landsins um fatnað, og sögðu myndirnar vera „skelfilega óviðeigandi“. Af trúarlegum ástæðum gilda strangar reglur um klæðnað kvenna í landinu og það er litið hornauga þegar kvenkyns ferðalangar eru berir að ofan eða sýna einhvers konar nekt. Það getur jafnvel talist sem brot gegn blygðunarsemi.
Luana svarar gagnrýninni í samtali við Daily Star. „Þetta er ein besta mynd sem hefur verið tekin af mér, en ég ætlaði ekki að gera lítið úr neinum,“ segir hún.
„Ég passaði að hylja brjóstin mín, vitandi að ég væri í landi þar sem er bannað að vera nakin, en þrátt fyrir það hefur mér verið ógnað.“
Einn fylgjandi hennar spurði á Instagram hvernig hún fór hjá því að vera handtekin vegna málsins. „Þeir leyfðu mér að gera hvað sem ég vildi, ég bý yfir persónutöfrum,“ sagði hún.