Áskorun eru nýir þættir sem hefja göngu sína í Sjónvarpi Símans þann 16. apríl næstkomandi. Í þáttunum er rætt við afreksfólk í íþróttum sem hefur með einstöku hugarfari og þrautseigju sigrast á ólíkum áskorunum í gegnum lífið, innan vallar og utan.
Áhorfendur kynnast viðmælendum í sínu náttúrulega umhverfi og fá að sjá hliðar sem fáir ef nokkrir þekkja, að baki sögum sem flestir hafa heyrt; kynnast manneskjunni undir búningnum. Rætt er við samstarfsfólk, fjölskyldu og vini og kafað undir yfirborðið í sögu hvers og eins.
Í fyrsta þætti er rætt við knattspyrnuþjálfarann Elísabetu Gunnarsdóttur. Hún flutti til Svíþjóðar eftir stormasaman feril hér heima og er nú að hefja sitt þrettánda tímabil hjá Kristianstad í Svíþjóð.
„Við vorum búin að byggja hús á sandi,“ segir Elísabet í stiklu fyrir þáttinn.
„Ég fæ bara gæsahúð þegar ég er að lesa þetta. Gæti meira að segja núna kallað fram tár,“ segir Elísabet og vísar í gamla frétt um sig sem ber fyrirsögnina: „Sökuð um að hafa þagað yfir ólöglegri lyfjaneyslu.“
Horfðu á stikluna hér að neðan.
Áskorun fer í loftið 16. apríl næstkomandi. Þátturinn kemur inn í Sjónvarp Símans Premium sama dag og verður einnig sýndur í línulegri dagskrá klukkan 20.10. Fimm þættir verða sýndir á fimm vikum.