Grínarinn og framleiðandinn Will Ferrell stendur í fullum undirbúningi þessa dagana að kvikmyndinni Eurovision, en sú mynd – líkt og nafnið gefur til kynna – fjallar um söngvakeppnina stórvinsælu og herlegheitin í kringum hana. Það eru risarnir hjá Netflix sem munu sjá um að framleiða myndina og verður þetta fyrsta samstarfsverkefni grínarans við streymiveituna.

Ferrell mun skrifa myndina ásamt Andrew Steele en þeir kumpánar hafa reglulega unnið saman síðan á dögum Ferrells hjá grínþættinum Saturday Night Live. Skrifuðu þeir einnig saman kvikmyndina Casa de mi Padre.

Ekki eru komnar neinar upplýsingar um söguþráð myndarinnar, en Ferrell er alls ekki söngvakeppninni ókunnugur og sást meðal annars í opnunarhófinu í Lissabon í ár, auk baksviðs og á ýmsum æfingum, sem hluti af sænsku sendinefndinni.

Reiknað er með útgáfu á næsta ári.