Svanhvít Tryggvadóttir og Georg Holm, kenndur við Sigur Rós, takast á við mikið mótlæti með ævintýralegum áformum en þau sjá fram á missa hugsanlega heimili sitt. Hjónin hafa staðið í ströngu vegna skattrannsóknar sem hefur haldið fjölskyldunni í heljargreipum í rúmlega þrjú ár en þau eru með ævintýrlega áætlun. Svanhvít sagði frá áformum fjölskyldunnar í viðtali við helgarblað DV fyrir skemmstu.
„Burt séð frá því hvernig þetta mál fer þá erum við að safna upp lögfræðikostnaði upp á tugi milljóna króna. Þó að þetta fari á besta veg þá erum við alltaf að tapa. Við gætum tapað öllu. Mér líður eins og það sé búið að dæma okkur sek áður en málið hefur verið tekið fyrir. Það er allt fryst og allt okkar líf sett í biðstöðu.“
Sjá nánar: Brotnaði niður í kjölfar ákæru um skattsvik:„Við bara skiljum þetta ekki“
Fjölskyldan dó þó ekki ráðalaus og fljótlega eftir að í ljós kom að þau gætu tapað heimili sínu fóru hugmyndirnar að koma. „Við hugsuðum að við sem fjölskylda yrðum að tækla þetta sem eining. Og þá kviknaði þessi hugmynd um að kaupa litla skútu og ferðast um heiminn og búa á henni. Við fengjum litla íbúðarkytru fyrir sama pening og skútu.“ Lífið sem fylgir skútudraumnum er þó óneitanlega ævintýralegra.
„Við höfum búið á Íslandi frá 2004 og ákváðum að gera bara ævintýri úr þessu. Nýtt upphaf.“ Stelpurnar voru til í að
fylgja ævintýralegum áætlunum foreldra sinna og síðastliðið ár hefur farið í undirbúning. Georg tók pungapróf og fjölskyldan byrjaði að selja hluti af heimilinu og leggja fyrir í skútusjóð.
Fjölskyldan ætlar að lágmarka eigur sínar við það sem kemst með á skútuna litlu og eru byrjuð að minnka bið sig og kaupaaðeins hluti sem henta væntanlegum lífstíl. „Við ætluðum að leggja af stað í september en það mun dragast eitthvað sökum faraldursins en við förum þegar við getum. Þó að það verði í janúar. Við tökum þetta bara á flæðinu, en við ætlum að fara.“
Svanhvít og Georg hafa vakið athygli á samfélagsmiðlum fyrir skemmtilegar hugmyndir í samkomubanni og það er nokkuð ljóst að þau geta skemmt sér vel saman og fjölskyldan hefur mikið hugmyndaflug. Þau hafa verið að streyma í beinni löngum
púlstundum sínum, stýrt spurningakeppnum fyrir stórfjölskylduna í gegnum fjarfundabúnað, verið með fjarsaumaklúbba og danspartí í eldhúsinu. Georg gerir sér einnig lítið fyrir og litar hárið á sinni heitt elskuðu heima fyrir.
„Þetta ástand hefur í raun undirbúið okkur vel undir ferðalagið. Stelpurnar eru búnar að vera í heimakennslu og við höfum þurft að skemmta hvert öðru og blessunarlega finnst mér þau geggjaðslega skemmtileg. Ég hef satt besta að segja sjaldan
verið eins félagslega virk og í þessu samkomubanni. Við erum með öll þessi fjarfundaforrit, Zoom, Houseparty, Whereby, Bluejeans og allt þetta. Þetta er bara eins og að velja bar. Hvar eigum við að hittast? Ég hef bara engar áhyggjur af okkur fjölskyldunni saman á báti.“
Framtíðin er, þrátt fyrir kvíðablandna bið eftir örlögunum, björt hjá fjölskyldunni. „Við erum öll hraust og okkur
líður vel saman. Vonandi verður bara enginn sjóveikur.“
