Þorsteinn B. Friðriksson, stofnandi Plain Vanilla og núverandi forstjóri Teatime, birti mynd af sér ásamt nýju ástinni, Rós Kristjánsdóttur, nú rétt fyrir jól þar sem hann lýsir yfir tilhlökkun og bjartsýni gagnvart komandi tímum. Plain Vanilla vakti athygli fyrir mikla velgengni á skömmum tíma með spurningaleikjasmáforritinu Quiz up, en með tímanum fækkaði spilurum og var fyrirtækið keypt af fjárfestingarfyrirtækinu Glu Mobile árið 2016. Yfir nýja fyrirtækinu ríkir nokkur dulúð en eina sem hefur verið staðfest er að það sé að þróa nýja tegund farsímaleikja. Fyrir skömmu náðust samningar milli Teatime og fjárfestingarsjóðsins Index Ventures upp á 200 milljónir íslenskra króna.

Rós stundar núna gullsmíði við Tækniskólann en hún hefur í nokkur ár starfað sem fyrirsæta samhliða námi og prýðir hún einmitt forsíðu nýjasta eintaks tímaritsins Reykjavík Fashion and Design. Ekki er langt síðan Þorsteinn lenti á lista yfir heitustu piparsveinana hjá Vísi en það entist skammt og virðist hann alsáttur við það hlutskipti.

Vinnu sinnar vegna þarf Þorsteinn að vera mikið á flakki erlendis og hefur Rós slegist með í för með honum og er honum vafalaust kærkominn félagsskapur. Þau eru núna stödd í San Francisco á vesturströnd Bandaríkjanna.