Ari Garðar Vilhelmsson, er fjögurra ára eldhress strákur, sem búsettur er í Grindavík. Á þriðjudagskvöld mátti hann lítið vera að því að fara að sofa og meðan móðir hans leit af honum teiknaði hann þetta fína listaverk á svefnherbergisvegginn fyrir ofan rúmið sitt.

„Ég fékk mig ekki í að skamma hann í morgun þar sem hann er hrikalega stoltur af þessu og þetta er sko hans veggur,“ segir Rakel Lind, móðir hans og segir listaverkið fá að standa eitthvað áfram.

Kvöldið eftir þegar Ari Garðar átti að fara að sofa fóru þau mæðgin að ræða listaverkið og ljóst að ungi maðurinn sér fullt þar sem við þessi eldri sjáum ekki.

„Þetta er sko langt í frá að vera bara eitthvað krot i hans augum,“ segir Rakel. „Í myndbandinu lýsir hann flestum smáatriðum fyrir mer og er virkilega gaman að hlusta á hversu ríkt ímyndunaraflið er þegar maður er 4 ára. Hann er svakalega stoltur og mikið af alls konar fídusum í þessu hjá honum.“

Ein af vinkonum Rakelar ráðleggur henni að taka afrit af myndinni, setja í ramma og gefa honum í brúðkaupsgjöf.