Jóhann féll frá aðeins 48 ára að aldri
Jóhann Jóhannsson tónskáld lést í gær, föstudaginn 9. febrúar, í Berlín. Jóhann var í fremstu röð sem kvikmyndatónskáld síðustu ár, virtur og velliðinn. Hann var tilnefndur til Óskarsverðlauna, BAFTA og Grammyverðlauna fyrir tónlist sína og hlaut Golden Globe verðlaun fyrir The Theory of Everything árið 2015.
Fjölmargir vina, samstarfsmanna og aðdáenda Jóhanns minnast hans með hlýhug og virðingu á samfélagsmiðlum í dag. „Einstaklega hæfileikaríkur og virkilega góður maður hefur kvatt okkur of snemma. Samúðarkveðjur til fjölskyldu hans, vina og samstarfsmanna. Frábær tónlist hans og minning mun lifa áfram, “ skrifar Ragnar Bragason leikstjóri, handritshöfundur og framleiðandi í minningu Jóhanns.
Páll Óskar söngvari skrifar: „Elsku Jói. Takk fyrir þína ómetanlegu samfylgd, öll þín listaverk og alla þína snilligáfu. Haltu áfram að vera fallegur þarna hinum megin. Þinn, Palli.“
„Sorgarfréttir. Eins og flestir Íslendingar fylgdist ég stolt með verkum Jóhanns Jóhannssonar, afrekum hans og velgengni. Foreldrum hans, dóttur og fjölskyldu sendi ég mínar innilegustu samúðarkveðjur. Blessuð sé minning hans,“ skrifar Ragnheiður Elín Árnadóttir, fyrrverandi iðnaðar- og viðskiptaráðherra.
Dagur B. Eggertsson borgarstjóri ritar: „Þetta er harmafregn. Ég er orðlaus og á satt best að segja erfitt með að trúa þessu. Tónlistin og tónlistarlífið hefur sannarlega misst mikið, að ógleymdum fjölskyldu og vinum. Votta öllum aðstandendum mína dýpstu samúð.“
Píanóleikarinn Víkingur Heiðar Ólafsson skrifar: „Hvíldu í friði, kæri Jóhann Jóhannsson, ég get ekki náð þessum fréttum. Þakka þér fyrir að vera svo hlý og ósvikin manneskja, frábær, djúp og falleg.“
Kollegi Jóhanns, tónskáldið Ólafur Arnalds, segir í twitterfærslu að Jóhann hafi verið einn allra fremsti listamaður samtímans og hafi haft mikil áhrif á hann.
One of the greatest artists of our time… And a huge influence on me. I hope you are in a good place Jóhann ❤https://t.co/9cHmvu8qdk
— Ólafur Arnalds (@OlafurArnalds) 10 February 2018
https://platform.twitter.com/widgets.js
Þá hafa margir helstu fjölmiðlar heims greint frá andláti Jóhanns. Meðal annars Variety, Rolling Stone, og Pitchfork, svo á einhverja sé minnst.
