„Ég myndi ekki segja að þetta væri fyrir alla en ég myndi samt mæla með þessu fyrir bæði kynin. Þú lærir svo ótrúlega margt, ekki síst sjálfsaga og að standa á eigin fótum,“ segir hin tvítuga Iðunn Getz Jóhannsdóttir en hún ber tvo afar ólíka starfstitla. Hún er lærður förðunarfræðingur en hefur undanfarna mánuði gegnt herþjónustu í Ósló og meðal annars staðið vaktina fyrir utan höll norsku konungsfjölskyldunnar.

Iðunn ólst upp í Garðabæ til 16 ára aldurs, hjá norskri móður og íslenskum föður, en fjölskyldan fluttist búferlum til Þrándheims árið 2013. Herskylda kvenna hefur verið í gildi í Noregi frá árinu 2015 og var Iðunn á lokaári í menntaskóla þegar hún fékk herkvaðningu. Hún ákvað að eigin sögn að henda sér út í djúpu laugina og að loknu inntökuprófi tók við þriggja mánaða grunnþjálfun.

„Þarna lærðum við allt mögulegt, eins og hvernig beita á vopni, kveikja á prímus, setja upp tjald, beita skyndihjálp og nota kort og áttavita. Það var líka farið sérstaklega út í stríðstækni í skógi og síðan voru bóklegir tímar og líkamsþjálfun.“

Iðunn hóf í kjölfarið störf hjá einni af herdeildum konungshirðarinnar í Ósló í apríl á þessu ári. Starfið snýst að miklu leyti um að gæta öryggis í opinberum byggingum og í konungshöllinni, og einnig á öðrum heimilum meðlima konungsfjölskyldunnar. Meðlimir herdeildarinnar standa einnig vaktina á þjóðarhátíðardaginn og við ýmis tilefni eins og setningu þingsins. Starfið innan hersins er sögn Iðunnar afar fjölbreytt og enginn dagur eins. Þá fylgja því ýmis fríðindi.

„Fyrir utan það þá hef ég fengið að kynnast sjálfri mér svo mikið betur. Ég er sjálfstæðari og öruggari og duglegri við að gefa af mér en áður. Auk þess hef ég séð hversu mikið ég get gefið af mér andlega og líkamlega, miklu meira en ég vissi að ég væri fær um. Þú getur alltaf gert meira en þú heldur.“