Gleði í bland við eftirvæntingu var einkennandi í Þjóðleikhúsinu á föstudagskvöld þegar leikritið Gott fólk var frumsýnt í Kassanum.

Leikritið er byggt á samnefndri skáldsögu Vals Grettissonar sem hlaut góða dóma þegar hún kom út á síðasta ári. Leikgerð var í höndum þeirra Vals og Símonar Birgissonar í samvinnu við Unu Þorleifsdóttur sem leikstýrir.

Gott fólk segir frá Sölva og Söru sem kynnast við ofbeldisfullar aðstæður. Þau eiga í stuttu en ástríðufullu ástarsambandi. Nokkru síðar fær Sölvi bréf þar sem Sara sakar hann um að hafa beitt hana kynferðisofbeldi. Sölvi þarf að játa á sig brot sem hann er þó ekki viss um að hafa framið. Í kjölfarið fer af stað atburðarás þar sem engum sem hlut á að máli er hlíft, og lífi Sölva og Söru er umturnað, eins og segir í lýsingu á verkinu á vef Þjóðleikhússins.

Félagar Símon Birgisson og Valur Grettisson eru góðir félagar enda störfuðu þeir lengi saman í fjölmiðlum. Símon er í dag handrits- og sýningardramatúrg í Þjóðleikhúsinu og kom hann að leikgerðinni.

Trúlofuð og fín Blaðakonan Marta María Jónasdóttir og Páll Winkel fangelsismálastjóri létu sig ekki vanta á frumsýninguna.

Reynslubankinn Ari Matthíasson (til hægri) þjóðleikhússtjóri lét sig að sjálfsögðu ekki vanta á frumsýninguna. Hér sést hann með hjónunum Páli Baldvini Baldvinssyni og Katrínu L. Ingvadóttur.

Flott hjón Lilja Pálmadóttir og Baltasar Kormákur eru líklega ein flottustu hjón landsins. Þau mættu á sýninguna á föstudagskvöld.

Fyrrverandi þjóðleikhússtjórar ásamt mökum Sveinn Einarsson og Þóra Kristjánsdóttir og Stefán Baldursson og Þórunn Sigurðardóttir.