„Flugþjónalífið er æðislegt.“ Þetta segir hinn síkáti og syngjandi flugþjónn Hjörleifur Már Jóhannsson sem á það til að bresta í söng í hátalarakerfinu líkt og sjá má á myndbandinu sem birtist hér að neðan og hefur heldur betur slegið í gegn undanfarinn sólarhring.

Hjörleifur sem er 35 ára, kvæntur, þriggja barna faðir byrjaði að vinna sem flugþjónn hjá WOW air í vor og kveðst aldrei hafa verið í skemmtilegra starfi. Áður starfaði Hjörleifur á Keflavíkurflugvelli. Hann viðurkennir að hafa líka sungið í kallkerfið þar, til dæmis eitt og eitt jólalag þegar sú var stemningin.

Hressasti flugþjónn Íslands?

Í samtali við DV segir Hjörleifur að það hvað hann hefur gaman að vinnunni smitist út í farþegana. „Ég kynni yfirleitt áhöfnina og reyni að gera það með smá stæl. Segi jafnvel einhverjar staðreyndir um þau sem eiga sér enga stoð í raunveruleikanum. Síðan þegar ég kynni sjálfan mig segi ég að Hjörleifur sé „an ancient Icelandic Viking name, sem sé erfitt að bera fram og af þeim sökum hafi ég tekið upp nafnið The Viking.“

Í umræddu flugi, þegar Hjörleifur syngur eigin útgáfu af laginu, Seasons in the Sun, er hann að kveðja farþegana um borð. Hann segir að söngurinn hafi komið í kjölfarið á skemmtilegu flugi þar sem stemningin var einstaklega góð.

„Þannig að ég henti í þennan texta til að geta kvatt alla þegar það á vel við en þetta fer svolítið eftir stemningunni hverju sinni.,“ segir Hjörleifur en afraksturinn má sjá hér að neðan.