Árni Johnsen, fyrrverandi alþingismaður, gefur í haust út tvo geisladiska sem innihalda þekkt barnalög. Árni, sem þjóðþekktur var fyrir brekkusöng sinn á Þjóðhátíðinni í Vestmannaeyjum í um þrjá áratugi, fer nú inn á nýjar brautir en hann segir í samtali við DV að verkefnið hafi verið mjög gefandi og skemmtilegt.
„Ég er þessa dagana að ljúka upptöku tveggja geisladiska sem innihalda 140 lög. Vinnsla þessara diska er í fullum gangi og stefnan er að þeir komi á markað í haust. Diskarnir innihalda öll helstu barnalög síðustu 50 ára,“ segir Árni í samtali við DV.
Aðspurður hvað hefði ýtt honum út í þessar upptökur sagði Árni að Íslendingar ættu mörg falleg barnalög sem þjóðin kann og kannast vel við.
,,Mér fannst málin hafa þróast með þeim hætti hin síðari ár að á leikskólum er að einhverju leyti hætt að spila og syngja þessi lög. Með útkomu þessari verður aðgengið miklu betra og fólk fer kannski núna að syngja og spila þessi lög með börnunum sínum í meira mæli en áður. Vinnan við þessa diska, sem koma út núna í haust, er búin að standa yfir í tvö ár og nú er upptökum sem sagt lokið. Mér fannst brýn ástæða til varðveita og vernda þessa tónlist,“ segir Árni. „Þetta var afskaplega skemmtileg vinna en með mér kom að henni stelpnakór sem er vanur að syngja.“
