Ágústa Eva Erlendsdóttir leik og söngkona og handboltakempan Aron Pálmarsson eru nýtt par. Hefur parið sést nokkrum sinnum saman og geislar hamingjan af þeim að sögn vina og vandamanna.
Ágústa Eva Erlendsdóttir varð fyrst þjóðþekkt fyrir Silvíu Nótt en vakti fyrst athygli sem söngkona með hljómsveitinni Ske. Síðan þá hefur hún slegið í gegn í hverju hlutverkinu á fætur öðru og fór með stór hlutverk í Mýrinni, Bjarnfreðarsyni, Borgríki og nýverið lauk tökum á Ég man þig sem gerð er eftir bók Yrsu Sigurðardóttur. Ágústa Eva hefur einnig slegið í gegn í stærstu leikhúsum borgarinnar og setti sýningarmet með Línu Langsokk.
Ágústa var áður í sambandi með Jóni Viðari Arnþórssyni bardagakappa í Mjölni en DV greindi frá skilnaðinum í febrúar. Þá sagði Ágústa: „Það eru allir sáttir og við gerum þetta í bróðerni. Það er fyrir öllu. Það er ekkert vesen eða læti og við erum bestu vinir og munum alltaf verða.“
Aron Pálmarsson þarf vart að kynna en hann er einn besti handboltamaður heims. Hefur hann margsinnis orðið Þýskalandsmeistari með Kiel en þar lék hann í mörg ár undir stjórn Alfreðs Gíslasonar. Hann leikur nú með stórliði Veszprém í Ungverjalandi.
Það er því ljóst að nokkur ferðalög eru framundan hjá parinu en Ágústa Eva er búsett í Hveragerði. Ættingi Ágústu segir parið „ekki ráða sér fyrir hamingju svo vægt sé til orða tekið“ en þau hafa sést nokkrum sinnum opinberlega saman.
