„Ég er ánægður með túrismann og kvarta ekki; hann gagnast mannlífinu hér, verslun, veitingastöðum, menningu, hag landsins. Auk þess sem þeir sem hingað vilja koma eru að sjálfsögðu velkomnir, rétt eins og við til þeirra landa. EN: Einu verður að gera bragarbót á. Þeir eru búnir að eyðileggja fyrir okkur „Bæjarins beztu,“ þetta segir rithöfundurinn Einar Kárason í pistli á Pressunni.

Einar segir Íslendinga þekkja kosti staðarins, vörugæðin, verðið og hlýlegt viðmót og hraða þjónustu. Nú sé 25 metra löng röð af túristum sem rétt silast áfram.

„ … því þeir eru ekki aðallega komnir til að kaupa pulsu, heldur upplifa atburð. Spjalla lengi um vöruúrvalið, taka svo selfí af sér, lúgunni, starfsfólkinu og helst ferðafélögunum.“

Þetta vill Einar leysa með því að koma fyrir færanlegum pylsuvagni við hliðina með skilti þar sem ferðamenn séu boðnir velkomnir: „Foreigners welcome, we speak English“.

„Við innfæddir myndum auðvitað fara á okkar gamla stað, en túristunum væri sléttsama, þeir þurfa bara að fylla í „Must do“ hakið í Reykjavík, eins og að sjá Hallgrímskirkju.“